Béarla
Gaeilge
Seolfaidh Céim Aniar CTR suíomh gréasáin nua Gaeilge, deartha agus tógtha ag Margaíocht Sháile, ag an am céanna le Seachtain na Gaeilge, a bheidh ar siúl ó Dhomhnach 1 Márta go Lá Fhéile Pádraig, 17 Márta 2026.
Seolfar an suíomh gréasáin nua maidin Dé Céadaoin, 6 Márta, in oifig Chéim Aniar in Áras Ros Goill, Na Dúnaibh, áit a mbaileoidh muintir na háite le haghaidh maidin chaife chun an ócáid a chomóradh.
Bunaíodh Céim Aniar sa bhliain 2001 leis an Ghaeilge agus an cultúr a chur chun cinn sa phobal Gaeltachta áitiúil. Le fiche bliain anuas agus níos mó, tá gníomhaíochtaí iarscoile, drámaíocht do dhaoine óga agus do dhaoine fásta, ranganna ceoil uirlise, cúrsaí Gaeilge agus foilsiú na hirise áitiúla Guth Ghoill á gcur ar fáil aici. Tá sí i gceannas fosta ar an Limistéar Pleanála Teanga do Thuaisceart Dhún na nGall.
Is suíomh lán-Ghaeilge é an suíomh nua agus léiríonn sé tiomantas na heagraíochta an Ghaeilge a chur i gcroílár a cumarsáide. Tógtha ar ardán WordPress, tugann sé deis do Céim Aniar CTR nuacht, imeachtaí agus an siopa ar líne a bhainistiú go díreach, rud a thugann níos mó smachta don ghrúpa ar a láithreacht dhigiteach.
Tá uirlisí feabhsaithe optamaithe inneall cuardaigh san ardán chun infheictheacht na heagraíochta ar líne a neartú agus a teacht a leathnú i measc chainteoirí agus fhoghlaimeoirí Gaeilge. Dearadh an suíomh le nascleanúint shoiléir agus leagan amach simplí, rud a fhágann go bhfuil sé éasca ag cuairteoirí teacht ar eolas faoi chúrsaí, imeachtaí, acmhainní agus an siopa ar líne.
Leis an seoladh le linn Sheachtain na Gaeilge, cuirtear béim ar iarrachtaí leanúnacha Céim Aniar CTR infheictheacht agus úsáid laethúil na Gaeilge a neartú i bpobal Ros Goill, idir shaol an phobail agus an saol ar líne.
Ghabh Stiúrthóir Bainistíochta Margaíocht Sháile, Oilibhéar Mac Giolla Bhríde, buíochas le Céim Aniar as an deis an suíomh a thógáil, ag rá:
“Is ábhar croí dúinn i Margaíocht Sháile a bheith ag obair ar thionscadail a chuidíonn leis an Ghaeilge a chur chun cinn agus a chaomhnú. Is í an tuiscint ar an tábhacht a bhaineann leis an suíomh don phobal áirithe sin an difear idir muid féin agus gníomhaireachtaí eile deartha gréasáin.
“Ba mhaith linn ardán a chruthú don todhchaí, ní hamháin don lá inniu.”
